Matthildarteymið leggur áherslu á að skapa öruggt rými fyrir fólk þar sem það getur átt heiðarleg samtöl um vímuefnanotkun sína og andlega vanlíðan.

Þjónustan er veitt til fólks á fyrri stigum vímuefnanotkunar og andlegrar vanlíðunar og snýr að lýðheilsu og snemmtækum inngripum.

Hvaða þjónusta er veitt:

Matthildarteymið veitir fræðslu og leiðbeiningar um öruggari vímuefnanotkun, skaðaminnkandi búnað og aðgang að vímuefnaprófum. Einnig dreifir verkefnið Naloxone nefúða og veitir fræðslu um áhættur ópíóíðanotkunar.

Matthildarteymið veitir einnig fólki sem glímir við andlega vanlíðan og geðrænar áskoranir, líkt og sjálfsvígshugsanir, kvíða og afleiðingar ofbeldis, aðgang að sálrænum stuðningi og aðstoð við að taka skref í viðeigandi heilbrigðis- og félagsþjónustu. Teymið veitir fræðslu um úrræði sem standa til boða og vísar í þjónustur.

Þjónustuinngrip:

1. Skaðaminnkandi fræðsla og ráðgjöf:
   Um öruggari vímuefnanotkun og varnir gegn ofskömmtun.

2. Skaðaminnkandi búnaður:
   Smokkar, eyrnatappar og skaðaminnkandi búnaður fyrir notkun.

3. Einföld vímuefnapróf:
   Vímuefnapróf draga úr líkum á ofskömmtun, óafturkræfum skaða og dauðsföllum.

4. Yfirseta og stuðningur:
   Þegar aðilar hafa innbyrt of mikið af áfengi/vímuefnum eða líður illa andlega

5. Skyndihjálp:
   Minniháttar slys.

6. Sálrænn stuðningur og samtal.

7. Naloxone dreifing + fræðsla.

8. Fræðsla um úrræði sem standa til boða og vísanir í heilbrigðis- og félagsleg úrræði.

Hvernig þjónustan fer fram:

Matthildarteymið setur þjónustuna upp í ákveðnu rými á viðburðum og tónlistarhátíðum, sem viðburðahaldarar hafa úthlutað teyminu. Auk þess veitir Matthildarteymið færanlega þjónustu um svæðið og er m.a. hægt að ná í teymið símleiðis.

Samstarfssamningur er gerður við viðburðahaldara sem óska eftir þjónustu teymisins.

Um verkefnið
Verkefnið var formlega sett á laggirnar í maí 2024. Í teyminu eru 10 sjálfboðaliðar sem veita þjónustuna. Öll hafa starfsreynslu á að veita skaðaminnkandi þjónustu og menntun sem nýtist í starfi. Einnig hafa þau setið námskeið og fengið sérþjálfun til að veita þjónustuna.

Sumarið 2024 veitti Matthildarteymið þjónustu á fimm hátíðum. Um 200 manns leituðu í þjónustuna og voru 315 þjónustuinngrip veitt.

Samtökin fengu styrk frá Styrktarsjóði geðheilbrigðis og Lýðheilsusjóði til að setja teymið á laggirnar.

Fyrirspurnir og óskir um þjónustu Matthildarteymisins er sent á svala@matthildur.is